Energetika vaziri o`rinbosari Sherzod Xo‘jayev elektr energetika sohasida juda ko‘p o‘zgarishlar bo‘lishini ma'lum qildi.

  15-sentyabr kuni Moliya vazirligida “Yashil iqtisodiyotga o‘tishda xususiy sektorning ishtiroki” mavzusida davra suhbati bo‘lib o‘tdi. Energetika vaziri o‘rinbosari Sherzod Xo‘jayev Kun.uz’ga bergan intervyusida 2022-yil 1-yanvardan sohada katta yangiliklar kutilayotganini bildirdi.

  Vazir o‘rinbosarining so‘zlariga ko‘ra, elektr energiya borasida Prezident qarori loyihasi ishlab chiqilgan.

  “Xalqaro mutaxassislar tomonidan 4 ta korxona, ya'ni “Issiqlik elektr stansiyalari” AJ, “O‘zbekgidro” AJ, “O‘zbekiston milliy elektr tarmoqlari” AJ va “Hududiy elektr tarmoqlari” AJ faoliyati o‘rganilgach, shu asosda prezident qarori loyihasi ishlab chiqildi. Ushbu loyihaga asosan 2022-yildan elektr energetika sohasidagi islohotlar keyingi bosqichga o‘tadi. Ikkinchidan, ochiq bozor bosqichiga o‘tish muddatlari, shartlari aniq aks ettirilgan konsepsiya va yo‘l xaritasi tasdiqlanadi”, – dedi Sherzod Xo‘jayev.

  Uning ta'kidlashicha, elektr energiyani o‘z ehtiyoji uchun ishlab chiqarish tartibida yangiliklar bo‘ladi. 

  “O‘ylaymanki, yil yakuniga qadar bu ishlarni boshlab yuboramiz va 2022-yil 1-yanvardan boshlab elektr energetika sohasida juda ko‘p o‘zgarishlarni ishlab chiqaruvchilar, investorlar va iste'molchilar his qilishadi.

  Eng muhim yangiligimizdan bittasi bu – elektr energiyani o‘z ehtiyoji uchun ishlab chiqarish tartibi yanada soddalashtiriladi. Qandaydir ishlab chiqarishi bor tadbirkor o‘z ehtiyoji uchun elektr ishlab chiqarishi mumkin. Bunda davlat unga bir qator qulayliklar beradi. Biroq bu qulayliklar aynan soliq imtiyozlari emas. Qayta tiklanuvchi energiya manbalari uchun soliq imtiyozlari foydalanishga berilgan, preferensiyalar mavjud. Shularning o‘zi yetarli deb o‘ylayman. Chunki ular uzoq muddatli – kamida 10 yilga mo‘ljallangan”, – dedi vazir o‘rinbosari.

  Shuningdek, davra suhbatida iqtisodiy taraqqiyot va kambag‘allikni qisqartirish vaziri Jamshid Qo‘chqorov tez orada bitta davlat elektr energiya stansiyasi xususiylashtiriladi. Biroq bu aynan qaysi stansiya ekanligi borasida OAVga aniq ma'lumot berilmadi.

https://kun.uz/uz/61131671

✍️ «O‘zbekiston MET» AJ Axborot xizmati

http://t.me/uzmetaxborotxizmati