Бугунги кунда энергия тежамкорлик масаласи барча давлатларда долзарб мавзуга айланиб бормоқда. Энергия ресурсларини тежаш, улардан фойдаланиш самадорлигини оширишга қаратилган қарорлар қабул қилинмоқда, қатор ҳужжатлар имзоланмоқда, илмий-тадқиқот ишлари олиб борилмоқда, тарғибот-ташвиқот ишлари амалга оширилмоқда.

Ана шу жараёнларда ўзига хос бир соҳа эгалари борки, улар ҳам энергия ресурслари тежамкорлигига катта ҳисса қўшишлари мумкин. Бу — ташкилотларда фаолият юритаётган фаррошлардир.

Энергетика вазирлиги Матбуот хизмати вазирликда фаолият юритиб келаётган фаррош Малика Усмонова билан энергия тежамкорлик ҳақида суҳбатлашди.

Фаолиятингизнинг электр энергияси тежамкорлиги билан нечоғлик боғлиқлиги ҳақида сўзлаб берсангиз?

– Энергетика ташкилотларида ишлаётганимга 23 йил бўлди. Тўғри, ўзим энергетика мутахассиси эмасман, лекин узоқ йиллар шу ерда ишлаганим учун тежамкорлик қанчалик муҳимлигини тушунганман.

Одатда биз ишга жуда эрта, кўпинча тонг ёришмасдан келиб, хоналарни тозалаймиз. Илгари ишга келишимиз билан бинодаги барча хоналарнинг чироқларини тўлиқ ёқиб чиқар эдик. Сабабини аниқ билмайман-у, негадир шу одат тусига кириб қолган эди-да. Ҳамкасбларим “хона ёруғ бўлса, унинг тозаланганлиги билиниб туради” деб ҳисоблашарди. Битта хонани тозалаш жараёнида бошқа хоналарнинг чироқлари соатлаб бефойда ёқилиб қолаверарди.

Ўйлаб қарасам, бу каттагина исроф экан. Биз ҳам энергияни тежашга ҳисса қўшишимиз мумкинлигини тушуниб, фақат тозаланаётган хонанинг чироғини ёқишга, қолган чироқларни доим ўчириб юришга одатландик.

Менимча, ҳамма ташкилотларда ишлаётган фаррошлар ана шундай тежамкорликка ўтса, анча энергияни тежашимиз мумкин. Шунинг учун ҳамма ҳамкасбларимга мурожаат қилиб айтмоқчиман: ҳурматли ҳамкасблар, сиз ҳам электр энергиясини тежашни одат қилинг.

Шунда биринчидан, ташкилотнинг харажати камаяди, иккинчидан эса, ушбу тежалган энергия узоқдаги қишлоқ хонадонларига ҳам етиб боради.

Ишхонамиз — иккинчи уйимиз. Уйда электрни қандай тежасак, ишхонадаям худди шунақа қилишимиз керак. Озгина электр учун ҳам қанча одам меҳнат қилишини бошқалар билмасаям мен яхши биламан. Уни бекорга увол қилмайлик.

Энергетика вазирлиги Матбуот хизмати

▶️@minenergy_uz

Манба: https://t.me/minenergy_uz/6892

«Ўзбекистон МЭТ» АЖ Ахборот хизмати

http://t.me/uzmetaxborotxizmati