Шу кунларда Хитой Халқ Республикасининг қайта тикланувчи энергия манбаларини ривожлантириш ва энергетика соҳасини рақамлаштириш борасидаги тажрибасини ўрганиш мақсадида ташкил этилган пресс-турда энергетика тизими матбуот котиблари ҳамда мамлакатимиз қатор ОАВ ходимлари иштирок этмоқда.

Бугун, 1 февраль куни пресс-тур қатнашчилари “China Energy Engineering Corporation” компаниясининг Пекин шаҳридаги бош офисида бўлишиб, ушбу халқаро компания фаолияти билан яқиндан танишди.

Пресс-тур чоғида иштирокчилар компаниянинг электр станцияларини лойиҳалаштириш, қуриш ҳамда уларга сервис хизмати кўрсатиш сингари йўналишлардаги тажрибалари билан танишдилар.

Иссиқлик электр станциялари ва гидроэлектростанция сингари анъанавий электр станциялари билан бир қаторда, қуёш фотоэлектр станцияси, шамол фотоэлектр станцияси ва атом электр станцияси сингари «яшил» энергетика манбаларини қуриш ҳамда сақлаб туриш борасидаги имкониятлари тўғрисида батафсил маълумотга эга бўлдилар.

Шунингдек, компаниянинг юртимизга инвестиция киритиш борасидаги фаолияти тўғрисида ҳам ўзларини қизиқтирган саволларга жавоб олдилар.