⚡️ Аввал хабар берганимиздек, «Ўзбекистон миллий электр тармоқлари» акциядорлик жамияти хориж тажрибасини ўрганиш ва мутахассислар малакасини ошириш борасида дунёнинг етакчи мамлакатлари электр энергетика тизими корхоналари билан илмий-амалий ҳамкорликни йўлга қўйган.

Мисол учун, 2024 йилнинг июнь ойида Акциядорлик жамияти ишчи делегацияси Россия Федерацияси электр энергетика корхоналарининг янги ишланмалари билан танишиш баробарида юқори кучланиш электр тармоқлари таянч устунларининг ерлагич тизимига оид инновацион ечимларни ўрганиб қайтишган эди.

Бугун, 2025 йил 12 май куни «Ўзбекистон миллий электр тармоқлари» акциядорлик жамияти кичик мажлислар залида юқори кучланишли электр тармоқлари таянч устунларининг ерлагич тизимига оид инновацион ишланмалар тақдимоти бўлиб ўтди. Унда Санкт-Петербург шаҳридан ташриф буюрган «ВОЛЬТ-СПБ» компанияси юқори қаршилик хоссасига эга асослар (тупроқ) учун ерлагич тизимлари хусусидаги тақдимот материалларини тақдим этишди.

Эслатиб ўтамиз, мазкур корхона чақмоқдан ҳимоя (яшинқайтаргич) ва юқори самарадорликка эга ерлагич тизимига оид инновацион ишланмаларини тегишли тартибда патентлаган ишлаб чиқарувчи ҳисобланади ва ўзининг инновацион ишланмалари билан дунёнинг бир неча мамлакатида ҳамкорлик фаолиятларини юритади.

Тақдимот тадбирида Акциядорлик жамияти раҳбарияти ва мутахассисларидан ташқари Ўзбекистон электр энергетика йўналишида фаолият олиб борадиган лойиҳа институтлари ҳамда қурилиш-монтаж ташкилотларидан вакиллар ҳам иштирок этишди. Мутахассислар хорижлик ҳамкорларга ўзларини қизиқтирган саволлар билан мурожаат қилиб, мамлакатимизда юқори кучланишли электр тармоқлари таянч устунларининг ерлагич тизимига оид мавжуд тажриба ва қўлланилаётган янги ишланмалар ҳақида маълумот бериб ўтишди.

«Ўзбекистон МЭТ» АЖ Ахборот хизмати
http://t.me/uzmetaxborotxizmati