2019–2024 йиллардаги маълумотлар ушбу ҳаволада   arxiv.uzbekistonmet.uz
Тармоқ илмий-техник кенгаши
Академик Қаҳрамон Аллаевнинг 80 йиллик юбилейига бағишланган В Халқаро анжуман бўлиб ўтди
  • 26.08.2025
  • 16

Бугун, 26 август куни Тошкент давлат техника университети ҳузуридаги Ўзбекистон – Япония ёшлар инновация марказида академик Қаҳрамон Аллаевнинг 80 йиллик юбилейига бағишланган “Электр таъминоти тизимининг долзарб муаммолари” мавзусида V Халқаро анжуман бўлиб ўтди.

Тадбирда Энергетика вазирлиги ва вазирлик тизимидаги ташкилотлар, Тошкент давлат техника университети, Ўзбекистон Республикаси Фанлар академияси, шунингдек, энергетика соҳасига оид халқаро ва маҳаллий ҳамкор олий таълим муассасалари вакиллари иштирок этди.

Тадбирда академик Қаҳрамон Аллаевнинг муборак 80 йиллик юбилейи тантанали нишонланди. Устоз олимга узоқ умр, соғлик-саломатлик, илмий ва педагогик фаолиятларида янги ютуқлар тиланиб, юртимиз тараққиёти ва ёш авлод тарбиясидаги хизматлари учун миннатдорлик билдирилди. Шунингдек, академикнинг мамлакатимиз энергетикаси ривожи, илм-фан тараққиёти ва ёш мутахассислар авлодини тайёрлашдаги беқиёс ҳиссаси юксак эътироф этилди.

Анжуманда рақамлаштириш жараёнлари, экологик чақириқлар ва кам углеродли иқтисодиётга ўтиш шароитида электр таъминоти тизимларининг ишончлилиги, энергия самарадорлиги ва барқарорлигини оширишга оид долзарб илмий ҳамда амалий масалалар муҳокама этилди.

Шу билан бирга, электр таъминоти тизимларини оптимал лойиҳалаш ва самарали эксплуатация қилиш, электр энергияси сифатини таъминлаш, энергетика соҳасига интеллектуал технологиялар ва рақамли ечимларни жорий этиш, «яшил» энергетикани ривожлантириш ҳамда қайта тикланувчи энергия манбалари юқори даражада интеграция қилинган электр таъминоти тизимлари фаолияти каби муҳим мавзулар кўриб чиқилди.

Анжуман доирасида, айниқса, янги авлод муҳандис кадрларни тайёрлаш, энергетикада экологик устувор йўналишларни илгари суриш, декарбонизация ва энергетика тизимларини барқарор ривожлантириш масалаларига ҳам алоҳида эътибор қаратилди.

Манба:  https://t.me/minenergy_uz/17541

«Ўзбекистон МЭТ» АЖ Ахборот хизмати 

http://t.me/uzmetaxborotxizmati