Bugun, 26-avgust kuni Toshkent davlat texnika universiteti huzuridagi O‘zbekiston – Yaponiya yoshlar innovatsiya markazida akademik Qahramon Allayevning 80 yillik yubileyiga bag‘ishlangan “Elektr ta’minoti tizimining dolzarb muammolari” mavzusida V Xalqaro anjuman bo‘lib o‘tdi.

Tadbirda Energetika vazirligi va vazirlik tizimidagi tashkilotlar, Toshkent davlat texnika universiteti, O‘zbekiston Respublikasi Fanlar akademiyasi, shuningdek, energetika sohasiga oid xalqaro va mahalliy hamkor oliy ta’lim muassasalari vakillari ishtirok etdi.

Tadbirda akademik Qahramon Allayevning muborak 80 yillik yubileyi tantanali nishonlandi. Ustoz olimga uzoq umr, sog‘lik-salomatlik, ilmiy va pedagogik faoliyatlarida yangi yutuqlar tilanib, yurtimiz taraqqiyoti va yosh avlod tarbiyasidagi xizmatlari uchun minnatdorlik bildirildi. Shuningdek, akademikning mamlakatimiz energetikasi rivoji, ilm-fan taraqqiyoti va yosh mutaxassislar avlodini tayyorlashdagi beqiyos hissasi yuksak e’tirof etildi.

Anjumanda raqamlashtirish jarayonlari, ekologik chaqiriqlar va kam uglerodli iqtisodiyotga o‘tish sharoitida elektr ta’minoti tizimlarining ishonchliligi, energiya samaradorligi va barqarorligini oshirishga oid dolzarb ilmiy hamda amaliy masalalar muhokama etildi.

Shu bilan birga, elektr ta’minoti tizimlarini optimal loyihalash va samarali ekspluatatsiya qilish, elektr energiyasi sifatini ta’minlash, energetika sohasiga intellektual texnologiyalar va raqamli yechimlarni joriy etish, “yashil” energetikani rivojlantirish hamda qayta tiklanuvchi energiya manbalari yuqori darajada integratsiya qilingan elektr ta’minoti tizimlari faoliyati kabi muhim mavzular ko‘rib chiqildi.

Anjuman doirasida, ayniqsa, yangi avlod muhandis kadrlarni tayyorlash, energetikada ekologik ustuvor yo‘nalishlarni ilgari surish, dekarbonizatsiya va energetika tizimlarini barqaror rivojlantirish masalalariga ham alohida e’tibor qaratildi.

Manba: https://t.me/minenergy_uz/17541

«O‘zbekiston MET» AJ Axborot xizmati 

http://t.me/uzmetaxborotxizmati