Япониянинг Панасоник компанияси қуёш панеллари (ПВ) орқали ишлайдиган водород энергия платформасини Мунхен шаҳридаги офис биносида синовдан ўтказишни бошлади. Бу платформа "Panasonic HX" деб номланади ва у тоза водород + сунъий интеллектли энергия бошқаруви орқали барқарор энергия таъминотини мақсад қилган.

Одатий қуёш энергияси билан ишлайдиган тизимларда батарея энергия сақлаш учун зарур бўлади. Лекин Германиядаги лойиҳада Сунъий интеллект –  AI асосида реал вақт режимида энергия бошқарадиган EMS (Energy Management System) туфайли батареялар ўрнатилмаяпти — бу лойиҳа харажат ва жойни тежайди.

⚡️ Платформа қандай ишлайди?

   ♦   У 190 кВ қувватли том қоплама қуёш панеллари билан жиҳозланган;

   ♦   Учта 10 кВ PH3 водород ёқилғи модули тизимга уланган;

   ♦   EMS тизими қуёш энергияси ва бинонинг электр энергия сарфи ўртасидаги ўзгаришларни реал вақт режимида бошқаради.

Лойиҳанинг аҳамияти:

Бу офис биносида тўлиқ қайта тикланадиган энергия ечими синовдан ўтказилаётган биринчи лойиҳа бўлиб, унда водород узоқ муддатли энергия сақлаш воситаси сифатида қўлланмоқда.

⚡️ Ушбу лойиҳа Ўзбекистонда қўлланилиши мумкинми? 

Албатта, ҳа. Чунки, деярли барча маъмурий бинолар, йирик бизнес марказлари ва бошқа тижорий оффисларларда қуёш панеллари ўрнатиш ишлари амалга оширилиб, 2025 йил 1 декабрь ҳолатига мамлакат бўйлаб жами 1971 МВ (деярли 2 ГВ) қувватли қуёш панеллари («roof-top») ўрнатилган.

Бундан ташқари, Чирчиқ шаҳридаги аммиак ишлаб чиқарувчи завод базасида Саудия Арабистонининг ACWA POWER компанияси билан ҳамкорликда ишга туширилган лойиҳада йилига 3 000 тонна яшил водород ишлаб чиқариш режалаштирилган. У асосан қуёш ва шамол энергиясидан олинадиган тоза электр билан сув электролизи орқали водород яратади. Бу водород кейинчалик минерал ўғитлар ишлаб чиқаришда фойдаланилади. Яшил водород деганда қуёш/панеллар ва шамол генераторлари энергиясидан фойдаланган ҳолда СО₂ чиқиндисиз (яъни атроф-муҳитга зарар келтирмай) водород ишлаб чиқариш тушунилади — бу «кулранг» водороддан фарқли равишда экологик тоза ҳисобланади.

Тажриба сифатида кичик ҳажмда, яъни электр энергияси юкламаси юқори бўлмаган биноларда ушбу лойиҳани қўллаб қувватлаш мумкин.

Интернет маълумотларидан фойдаланиб тайёрланди.

✍️ Равшанжон Ёқубжонов, Электр тармоқларини инновацион ривожлантириш бошқармаси бош мутахассиси

 ✔️ Каналга обуна бўлиш учун: ⇒ https://t.me/+Pz1qHR0W8mYzNmZi

‖ Facebook ‖ Инстаграм ‖ YouTube ‖

«Ўзбекистон МЭТ» АЖ Ахборот хизмати 

http://t.me/uzmetaxborotxizmati