#расмий_хабар

Ҳозирги вақтда чекланган энергия ресурсларидан оқилона фойдаланиш ҳамда истеъмол маданиятини ошириш мақсадида Энергетика вазирлиги томонидан қайта тикланувчи энергия манбалари ҳисобидан энергия истеъмолини қоплаш йўналишида тизимли ишлар амалга оширилмоқда.

Жаҳон тажрибаси шуни кўрсатадики, Белоруссия, Хитой ва қатор Европа давлатларида энергия истеъмолини тўлиқ декарбонизация қилиш, “Зеро сарбон – эсо ҳоме” тамойиллари асосида уй-жойлар қуриш ва истеъмолни тўлиқ электрлаштириш амалиёти муваффақиятли жорий этилган. Мазкур ёндашув дунё мамлакатларида кенг оммалашмоқда.

Шу муносабат билан Ўзбекистонда ҳам энергия истеъмоли маданиятини ошириш, янги барпо этилаётган кўп қаватли турар-жойларни тўлиқ электрлаштириш, овқат тайёрлаш учун электр плиталари билан таъминлаш, иситиш тизимини электр энергиясига ўтказиш ҳамда табиий газ тармоқларига уланмаган кўп хонадонли уйлар, ётоқхоналар ва газлаштирилмаган ҳудудлардаги ҳовлилар учун имтиёзли тарифларни жорий этиш бўйича ҳисоб-китобларга асосланган таклифлар ишлаб чиқилган.

Мазкур таклифлар лойиҳасига кўра, овқат тайёрлаш учун электр плиталари билан жиҳозланган, иситиш тизими тўлиқ электрлаштирилган, марказлашган иситиш тизими ва табиий газ тармоқларига уланмаган кўп қаватли уйлар, ётоқхоналар ҳамда газлаштирилмаган ҳудудларда яшовчи маиший истеъмолчиларга (субсидияланадиган нархлардаги суюлтирилган газ, кўмир ёки табиий газдан фойдаланмаган тақдирда) ойлик истеъмол ҳажмига қараб:

иситиш мавсумида — 2000 кВт·соатгача;

иситиш мавсумидан ташқари — 1000 кВт·соатгача;

электр энергияси истеъмоли учун амалдаги тарифларга нисбатан 50 фоизгача чегирма қўллаш назарда тутилмоқда. 
Таклифлар идоралараро тартибда келишилган.

Ҳозирда мавжуд электр тармоқларининг қўшимча юкламани қабул қилиш имконияти бўйича техник аудит давом этмоқда. Шунингдек, Энергетика вазирлиги, ИМВ, Ўзенергоинспекция, ҲEТ АЖ ва ҲГТ АЖ томонидан қўшимча ўрганишлар олиб борилмоқда.

Мазкур ислоҳотлар Ўзбекистон энергетика тизими учун муҳим трансформация жараёни бўлиб, халқаро тажрибада кузатилганидек, бундай ўзгаришлар чуқур таҳлил, вақт ва юқори даражадаги эҳтиёткорликни талаб қилади. Жараённинг босқичма-босқич амалга оширилиши тизимнинг стратегик аҳамиятидан келиб чиқади.

Шуни алоҳида қайд этиш лозимки, айрим ижтимоий тармоқ фойдаланувчилари томонидан мазкур жараённинг мураккаблиги ва масъулият даражасини инобатга олмаган ҳолда нохолис талқин қилинмоқда. Таклифларнинг кўриб чиқилиши ва қабул қилиниши амалдаги регламентларга қатъий риоя этилган ҳолда амалга оширилмоқда.

Ҳисоб-китоблар ва техник аудит якунига кўра, умумий хулоса шакллантирилади ва шундан сўнг таклифларнинг амалиётга татбиқ этилиши таъминланади.

Энергетика вазири Жўрабек Мирзамаҳмудов томонидан мазкур таклифлар тегишли давлат органларига тақдим этилгани, аудит жараёнлари давом этаётгани ва ишлаб чиқилган механизмнинг келгуси йилда жорий этилишидан умидворлиги бир неча бор оммага маълум қилинган.

Юқоридагилардан келиб чиқиб, жамоатчиликдан мазкур жараёнларга холисона ёндашиш, фактларга асосланган баҳо бериш ҳамда расмий маълумотларга таянишни сўраймиз.

Манба:  https://t.me/minenergy_uz/18542 

«Ўзбекистон МЭТ» АЖ Ахборот хизмати 

http://t.me/uzmetaxborotxizmati