⚡️ Avval xabar berganimizdek, «O‘zbekiston milliy elektr tarmoqlari» aksiyadorlik jamiyati tasarrufidagi magistral elektr tarmoqlari filiallarida elektr energiyasini uzatish (transportirovka) jarayoni barqarorligini ta’minlaydigan navbatchi guruhlar brigadasi tashkil etilgan bo‘lib, ular tomonidan yuqori kuchlanishli elektr tarmoqlari hamda podstansiyalarda rejaga muvofiq nazorat ko‘riklari hamda joriy ta’mirlash ishlari o‘tkazilmoqda.

E’tiboringizga havola etilayotgan suratlarda «Namangan magistral elektr tarmoqlari» filiali Podstansiyalar xizmati hamda Tarmoqlar xizmati mutaxassislarining magistral elektr tarmoqlari va yuqori kuchlanishli podstansiyalarda o‘tkazgan nazorat ko‘rigi hamda joriy ta’mirlash ishlari aks etgan.

110–220 va 500 kV kuchlanishli elektr tarmoqlari nazorat ko‘rigida aniqlangan kamchiliklar maxsus texnika va mexanizmlar bilan qurollangan taʼmirlash-sozlash guruhlari tomonidan bartaraf etilmoqda.  Jumladan, mutaxassislar metall konstruksiyali ustunlarni mustahkamlash ishlarini davom ettirib, shikastlangan tarmoq elementlari almashtirilmoqda.

⚡️ Bundan tashqari, liniyalarning kontakt birikmalari teplovizor ko‘rigidan o‘tkazilib, qushlar qo‘nishiga qarshi moslamalar, chaqmoqqaytargich troslar hamda kontur yerlagichlar holati tekshirilmoqda.

Shu bilan birga, Podstansiyalar xizmati mutaxassislari Namangan viloyatidagi yuqori kuchlanishli podstansiyalarga o‘rnatilgan transformatorlarining yog‘ sathi meʼyori, sovitish tizimi sozligi va boshqa meʼyoriy ko‘rsatkichlarini nazoratga olish bo‘yicha tegishli amaliyotlarni bajarishmoqda.

Elektr energiyasi iste’mol hajmi sezilarli darajada oshib borayotgan issiq ob-havoli kunlarda yuqori kuchlanishli podstansiyalarda mavjud transformatorlarning sovitish tizimi ta’mirlanib, elektr qurilma va jihozlari chanq qoplamalaridan tozalanmoqda. Releli himoya va avtomatika tizimidagi nosoz qurilmalar ta’mirlanmoqda, himoya tizimlarining elektron ta’minot dasturlari takomillashtirilmoqda.

Eslatib o‘tamiz, “O‘zbekiston milliy elektr tarmoqlari” aksiyadorlik jamiyati generatsiya jarayonida hosil bo‘lgan elektr energiyasini magistral elektr tarmoqlari va yuqori kuchlanishli podstansiyalar orqali taqsimlovchi tarmoqlarga uzatish (transportirovka), shuningdek, elektr energiyasi davlatlararo tranziti bilan shug‘ullanadi.

Joriy ta’mirlash jarayonlari haqida batafsil

‖  Facebook ‖ Instagram ‖ YouTube

«O‘zbekiston MET» AJ Axborot xizmati
http://t.me/uzmetaxborotxizmati