☪️ QURBON HAYITI — MEHR-OQIBAT, SAXOVAT VA EZGULIK TANTANASI

Muhtaram yurtdoshlar!
Qadrli hamkasblar!

Avvalo, Siz azizlarni butun islom ahli uchun ulug‘ va muborak bo‘lgan Qurbon hayiti ayyomi bilan chin qalbimdan samimiy muborakbod etaman. Bu qutlug‘ bayram asrlar davomida xalqimizning eng ezgu fazilatlari — mehr-oqibat, insonparvarlik, saxovat, shukronalik va bag‘rikenglik kabi oliyjanob qadriyatlarni o‘zida mujassam etib kelayotgan beqiyos ma’naviy ne’matdir. Qurbon hayiti inson qalbini poklik va ezgulikka chorlaydigan, odamlarni bir-biriga yanada yaqinlashtiradigan, jamiyatimizda hamjihatlik va muruvvat muhitini mustahkamlaydigan ulug‘ ayyomdir.

Ayniqsa, bugungi mas’uliyatli zamonda inson qalbida mehr-shafqat, oqibat va saxovat tuyg‘ularini yanada kuchaytirish har qachongidan ham muhimdir. Zero, xalqimizning azal-azaldan davom etib kelayotgan bag‘rikenglik va muruvvat an’analari yurtimiz tinchligi, jamiyatimiz barqarorligi hamda farovon hayotimizning mustahkam poydevoridir.

Qurbon hayiti kunlari inson uchun eng ulug‘ ne’mat bo‘lgan ota-ona duosini olish, yaqinlar holidan xabar olish, ko‘ngillarga quvonch ulashish, yordamga muhtoj insonlarni qo‘llab-quvvatlash kabi savobli va xayrli amallarning qadri yanada ortadi. Chunki, bu muborak kunlarning mohiyatida insoniylik, fidoyilik va ezgulik mujassamdir.

Bugun Yangi O‘zbekistonni barpo etish yo‘lida amalga oshirilayotgan keng ko‘lamli islohotlarning tub mohiyatida ham inson qadri, xalq manfaatlari va jamiyat farovonligini ta’minlashdek ezgu maqsadlar mujassamdir. Shu ma’noda, Qurbon hayitining insonparvarlik va saxovatga undovchi ulkan tarbiyaviy ahamiyati bugungi taraqqiyot yo‘limiz bilan hamohangdir.

Mamlakatimiz energetika sohasi, ayniqsa elektr energetika tarmog‘i iqtisodiyotimiz barqarorligi, sanoat taraqqiyoti va xalqimiz farovonligini ta’minlashda tobora muhim strategik tayanchga aylanib bormoqda. Ushbu sharafli va mas’uliyatli sohada fidokorona mehnat qilayotgan barcha hamkasblarimizning sa’y-harakatlari Yurtimiz ravnaqiga xizmat qilayotganini alohida mamnuniyat bilan e’tirof etaman.

☪️ Muqaddas Qurbon hayiti har bir xonadonga fayz-u baraka, qalblarga taskin va osoyishtalik olib kirsin. Dasturxonlaringizdan qut-baraka, oilalaringizdan mehr-oqibat, yurtimizdan tinchlik va farovonlik arimasin.

♦ Alloh taolo xalqimizni o‘z panohida asrasin, jonajon Vatanimizga tinchlik-osoyishtalik, taraqqiyot va yanada yuksalishlar ato etsin. Barchamizga kelgusi hayit ayyomlariga ham sog‘-salomat, baxt-u saodat va ezgu niyatlar bilan yetib borishni nasib aylasin.

Yana bir bor barchangizni muborak Qurbon hayiti bilan samimiy qutlayman!

 

Hurmat bilan,

✏️ A. A. Nazirov,
“O‘zbekiston milliy elektr tarmoqlari” aksiyadorlik jamiyati boshqaruvi raisi